Бразилиянинг Риу-Гранди-ду-Сул Федерал университети олимлари Америка райҳони экстракти мия қаришини секинлаштириши, оксидловчи стресс ва яллиғланишни камайтиришини аниқлади. Тадқиқот натижалари Nutrients журналида чоп этилган.

Олимлар каламушлар устида тажриба ўтказиб, райҳон қўшимчасининг хотира ва ўрганиш учун муҳим бўлган гиппокампга таъсирини ўрганишган. Натижаларга кўра, райҳон таркибидаги бирикмалар организмда ҳужайраларни шикастловчи актив кислород шаклларини камайтирган. Шу орқали у оксидловчи стрессни олдини олиб, нейронларнинг фаолиятини сақлаб қолган.  

Тажриба давомида райҳон экстракти гиппокампдаги ҳужайра мембраналарини ҳимоя қилгани, шунингдек, яллиғланиш жараёнларини кучайтирувчи TNF-α ва IL-1β ситокинлари даражасини пасайтиргани аниқланган. Бу эса мия тўқималарида нейрояллиғланиш хавфини камайтирган.  

Биокимёвий таҳлилга кўра, райҳон таркибида розмарин ва хлореген кислоталари каби кучли антиоксидант фенол бирикмалари мавжуд. Олимларнинг фикрича, айнан шу моддалар мия ҳужайраларини ҳимоя қилувчи — нейропротектив — таъсирни таъминлайди.  

Тадқиқотчилар бу натижалар асосида Америка райҳони экстрактидан биологик фаол қўшимчалар ва нутрасевтик воситалар ишлаб чиқиш мумкинлигини таъкидламоқда. Бироқ инсон организми учун энг самарали доза ва шаклни аниқлаш учун қўшимча тадқиқотлар зарурлиги қайд этилган.  

<iframe width="560" height="315" src="https://www.youtube.com/embed/7fqpDNkmR2I?si=cygfNIv7wgip63Pv" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Анвархўжа Аҳмедов, ЎзА