Shvetsiyalik biologlar geolokatsiyaning yangi texnologiyasidan foydalangan holda jarqaldirg‘ochlarining sayyoramiz bo‘ylab ko‘chib yurishi jarayonida rekord tezligini qayd etishdi. Yaqinda iScience jurnalida ushbu tadqiqotlarning natijasi e’lon qilindi.

Ma’lumki, jarqaldirg‘ochlar eng tez uchadigan qushlar hisoblanadi. Ular ko‘payish vaqtini hisobga olmasa butun umrini havoda o‘tkazadi. Avvallari olimlar jarqaldirg‘ochlar migratsiyasini o‘rganib, ularning kuniga 500 kilometr yo‘l bosishini aniqlagan edi. Endi ma’lum bo‘lishicha, bu raqamlar sezilarli ravishda pasaytirilgan ekan.

Shvetsiyadagi Lundsk universiteti olimlarining aniqlashicha, jarqaldirg‘ochlarining parvoz tezligi aslida kuniga 570 kilometrgacha yetar ekan. Qolaversa, bu o‘rtacha ko‘rsatkichdagi tezlik. Kuzatuvlar natijasida olimlar ushbu qushlar qatorasiga to‘qqiz kun mobaynida har kuni 830 kilometrlik masofani bosib o‘tganini aniqlashgan.

Jarqaldirg‘ochlar uzluksiz parvozi bilan bir yilda 10 oy havoda qolishi mumkin, lekin rekord tezligi bahorgi migratsiya mavsumiga to‘g‘ri kelar ekan. Ular ovqatlanish uchun vaqt sarflab yurmaydi, parvoz vaqtida havoda uchib yurgan hasharotlarni ushlab oziqlanadi.