Андижон давлат тиббиёт институтида “Интеллектуал аёл – жамият пойдевори” мавзусида маънавий-маърифий тадбир бўлиб ўтди. Унда хотин-қизларнинг илм-фанга бўлган қизиқиши, жамиятдаги нуфузи ҳамда фаоллигини ошириш, уларни қўллаб-қувватлаш ва ютуқлари салмоғини юксалтириш мақсадида амалга ошириладиган ишлар ҳақида сўз борди. Тадбирда институт профессор-ўқитувчилари, ёш олималар, иқтидорли талаба қизлар иштирок этди.

Тадбирда сўз олган институт ректорининг хотин-қизлар масалалари бўйича маслаҳатчиси Гулҳаё Холматова, “Олима” уюшмаси раиси Хурматой Хонкелдиева аёлларнинг жамиятдаги ўрни, роли, айниқса, юксак интеллектуал салоҳиятга эга аёл жамиятда маънавий барқарорликни таъминлаш, илм-фан ривожида фаол иштирок этиши алоҳида таъкидланди.

Шунингдек, институтнинг Биокимё кафедраси мудири, профессор Ирода Маматова халқаро қўшма илмий тадқиқотлар олиб бориш, халқаро грант ва лойиҳаларда иштирок этиш масалалари хусусида ўз фикрларини баён қилди. Биологик физика, информатика ва тиббий технологиялар кафедраси ўқитувчиси Мохинабону Қобулова илмий мақолалар чоп этиш, иқтибослик кўрсаткичларни ошириш, замонавий технологияларни таълим ҳамда илмий фаолиятга жорий этиш бўйича таклиф ва тавсиялар берди.

Тадбир якунида илмий йўналишда самарали фаолият олиб бораётган бир гуруҳ ўқитувчи ва иқтидорли талабалар институт ректоратининг ташаккурномаси билан тақдирланди. 

Ф. Убайдуллаев, З. Умрзоқов (сурат), ЎзА мухбирлари.