Ўзбекистон Республикаси Президенти соврини учун анъанавий тарзда ўтказиб келинаётган “Ташаббус” кўрик-танловининг Тошкент шаҳар босқичи бўлиб ўтди.

Ўзбекистон Республикаси Президенти соврини учун анъанавий тарзда ўтказиб келинаётган “Ташаббус” кўрик-танловининг Тошкент шаҳар босқичи бўлиб ўтди.

Давлатимиз раҳбари ташаббуси билан ташкил этилган мазкур танлов мамлакатимизда кичик бизнес ва хусусий тадбиркорлик, миллий ҳунармандчиликни ривожлантириш, ишбилармонларнинг ғоя ва ташаббусларини қўллаб-қувватлаш, тажрибасини кенг оммалаштиришга хизмат қилмоқда.

Танловнинг Тошкент шаҳар босқичи ҳам юқори савияда ташкил этилди. Соҳага қаратилаётган доимий эътибор ва қулай инвестициявий муҳит самарасида бугунги кунда пойтахтимизда эллик мингдан ортиқ кичик бизнес ва хусусий тадбиркорлик субъекти фаолият кўрсатмоқда. Улар томонидан импорт ўрнини босувчи, рақобатбардош маҳсулотлар ишлаб чиқарилмоқда, сифатли хизматлар кўрсатилмоқда.

– Танловнинг Тошкент шаҳар босқичида туманларда ғолиб бўлган ўн биттадан тадбиркор ва ҳунарманд иштирок этди, – дейди Савдо-саноат палатасининг Тошкент шаҳар бошқармаси бошлиғи Улуғбек Абдуллаев. – Улар янги иш ўринлари яратишда фаоллик кўрсатган, экспорт ва импорт ўрнини босадиган маҳсулот ишлаб чиқарадиган илғор ишбилармонлардир.

Танловда «Энг яхши тадбиркор», «Энг яхши ҳунарманд» номинациялари, шунингдек, «Энг яхши ёш тадбиркор», «Энг яхши ёш ҳунарманд», «Энг яхши аёл тадбиркор», «Энг яхши оилавий бизнес соҳиби», «Ёшларга энг кўп иш ўринлари яратган тадбиркор», «Энг масъулиятли иштимоий шерик», «Энг яхши экспортчи», «Менинг юртим – менинг ифтихорим» каби йўналишлар бўйича ғолиблар аниқланди.

Чилонзор туманидаги «Мagnus Industrial Group» хусусий фирмаси раҳбари Анвар Нодирхонов «Энг яхши тадбиркор», Олмазор туманида фаолият кўрсатаётган ҳунарманд Мадина Қосимбоева «Энг яхши ҳунарманд» номинацияси бўйича биринчи ўринни қўлга киритди.

Ғолиблар “Ташаббус – 2016” кўрик-танловининг мамлакат босқичида иштирок этади.