Ўзбекистон Республикаси Вазирлар Маҳкамасининг 2018 йил 6 октябрдаги тегишли қарори билан тасдиқланган “Алиментларни олдиндан тўлаш, шунингдек, алимент тўлаш мажбуриятини таъминлаш бўйича гаров шартномасини тузиш тартиби тўғрисида”ги низомда алиментларни беш йилдан кам бўлмаган муддат учун олдиндан тўлаш мумкинлиги кўрсатилган.

Бош прокуратура ҳузуридаги Мажбурий ижро бюроси Наманган вилояти бошқармасининг Мингбулоқ тумани бўлими ходимлари томонидан олиб борилган тушунтиришлардан сўнг алимент тўловчи шахс болалари учун беш йиллик алимент пулларини тўлаб берди.

Фуқаролик ишлари бўйича Наманган туманлараро судининг ижро ҳужжатига кўра, қарздор Х.К. дан ундирувчи Н.К. фойдасига икки нафар вояга етмаган фарзандининг моддий таъминоти учун алимент ундириш белгиланган.

Давлат ижрочисининг тушунтириш ишлари натижасида қарздор ота фарзандларининг моддий таъминоти учун жорий йилнинг май ойидан 2030 йилнинг май ойига қадар ҳисобланган салкам 189 миллион сўм алимент пулларини олдиндан тўлаб берди. 

Ўз масъулиятини ҳис қилган отанинг ушбу ишидан кейин суднинг қарорига кўра, ижро усули ўзгартирилиб, қарздорнинг хорижга чиқиш чекловлари олиб ташланди.

Оқилхон Дадабоев, ЎзА.