Германия президенті Франк-Вальтер Штайнмайер елдің федералды канцлері Олаф Шольц пен оның үкіметіндегі 14 министрге отставка туралы куәліктерді ресми түрде табыс етті.

Салтанатты рәсім 25 наурыз, сейсенбі күні Берлиндегі Белвю президент сарайында өтті.

Германия Федератив Республикасының Негізгі заңының 69-бабына сәйкес, жаңа Бундестаг шақырылған күннен бастап канцлер мен министрлер өз өкілеттіктерін тоқтатады. Жаңа парламенттің алғашқы отырысы дәл осы 25 наурыз күні өтті.

Алайда президент Штайнмайер Олаф Шольц пен оның үкімет мүшелерінен біраз уақыт — жаңа үкімет құрылғанша қызметін уақытша жалғастыруды сұрады. Бұл тәртіп заңмен де бекітілген.

Жаңа үкімет құрылмайынша, Шольц пен министрлер міндеттерін атқара береді. Айта кетейік, Фридрих Мерц жаңа үкіметті Пасха мейрамына дейін, яғни 20 сәуірге дейін қалыптастыруға уәде берген.