Куни кеча, яъни 23 февраль куни океан орти мамлакати – Доминикан Республикасида ўзбек спорти кураш куни нишонланди.

Ушбу сана муносабати билан кураш спортининг техник-тактик жиҳати, унинг тарихи, келиб чиқиши, қонун-қоидаси тўғрисида маърузалар, оммавий сайллар, ҳакамлик ва мураббийлик семинарлари, шунингдек курашчиларнинг кўргазмали чиқишлари амалга оширилди.

Ҳакамлар “гилам”, таъзим”,  ҳалол”, “танбеҳ”, “тўхта”, “бекор” каби ўзбекона ибораларни ўзида жамлаган иборалар билан беллашувларни бошқарди. Кўк ва яшил яктакдаги спортчилар томошабинларга курашнинг жозибали усулларини намойиш этди.

Айтиш лозим, Доминикан Республикасида бундан саккиз йил муқаддам, яъни 2018 йил 23 февралда кураш федерацияси ташкил этилган бўлиб, шундан бери ушбу мамлакатда ўзбек спорти кураш бўйича ички чемпионатлар, биринчиликлар, турнирлар мунтазам ўтказиб келинади. 23 февраль санаси анъанавий тарзда кураш куни сифатида нишонланади.

Кураш бўйича Доминикан Республикаси миллий терма жамоаси 1998 йилдан Осиё, Европа, Африка ва Америка қитъасида ташкил этиб келинаётган мусобақаларда мунтазам қатнашиб келмоқда.

— 2004 йилда Пан Америка чемпионатига, 2006 йилда эса ўсмирлар ўртасидаги жаҳон чемпионатига мезбонлик қилдик. Мамлакатимиз бир неча йилдан буён Пан Америка чемпионатларини мунтазам қабул қилиб келмоқда. Шу билан бирга, миллий чемпионатлар, ҳакамлик ва мураббийлик курслари доимий равишда ташкил этилмоқда. Халқаро майдондаги ютуқлар орасида 2023 йил Туркманистоннинг Ашхобод шаҳрида ўтказилган жаҳон чемпионатида терма жамоамиз аъзоси Аудрея Пуелло Перез томонидан қўлга киритилган олтин медаль алоҳида эътирофга лойиқ. Шу ўринда курашдек жозибали спорт турини дунё спортчиларига тортиқ этган Ўзбекистонга, унинг меҳмондўст халқига миннатдорлик билдираман, — дейди Доминикан кураш федерация президенти доктор Агустин Карабалло Жименез.

Бу, Ўзбекистон Республикаси Президенти Ш.Мирзиёев томонидан имзоланган “Кураш миллий спорт турини ривожлантириш ва унинг халқаро нуфузини янада ошириш чора-тадбирлари тўғрисида”ги қарорида белгиланганидек, мардлик, жасурлик, ватанпарварлик, гуманизм ғояларини ўзида мужассам этган миллий спортимиз курашни оммалаштириш, дунёга танитиш ҳамда умумжаҳон дурдонасига айлантириш борасида амалга оширилаётган кенг кўламли саъйи-ҳаракатнинг халқаро акс-садоси, дейиш мумкин.

Шу билан бирга, Америка қитъасининг Доминикан мамлакатида кураш спорти кунининг алоҳида нишонланиши миллий қадриятларимизнинг, жаҳон майдонида ёрқин намоён бўлаётган янги Ўзбекистоннинг тантанаси, халқаро спорт жамоатчилигининг ватанимизга эҳтироми, ота-боболаримиздан мерос анъаналарга чуқур ҳурмати эканлиги билан аҳамиятлидир.

Тўлқин Рўзиев, ЎзА