Дунёнинг турли давлатларида инсонлар қарийб қирқ йилдан буён ОИВ ва ОИТС касаллиги қурбонига айланиб, оилаларнинг тинчлиги бузилмоқда. Афсуски, мамлакатимизда ҳам ушбу инфекцияга қарши кураш олиб борилаётган, унинг оқибатлари аҳоли кенг қатламларига тушунтирилаётган бўлса-да, мигрантлар, никоҳланувчилар ва носоғлом турмуш кечирувчилар ўртасида бу дардга чалиниб, даволанаётганлар бор.

Бу ҳолат жамиятимизда касалликнинг кенг тарқалишига қарши курашиш юзасидан олиб борилаётган тарғибот-ташвиқот ишлари сифати ва натижадорлигини оширишни тақозо этмоқда. Шунга мувофиқ қабул қилинган Вазирлар Маҳкамасининг жорий йил 21 февралдаги “Ўзбекистон Республикасида одам иммунитет танқислиги вируси инфекцияси тарқалишига қарши кураш бўйича ёшлар фаоллигида олиб бориладиган тизимли тарғибот тадбирлари консепциясини тасдиқлаш тўғрисида” ги қарори бу борадаги чора-тадбирлар самарадорлигини оширишга хизмат қилади.

Термизда бўлиб ўтган одам иммунитет танқислиги вируси инфекцияси тарқалишини камайтириш, инфекция тарқалишининг олдини олиш ҳудудий ишчи гуруҳининг йиғилишида шу ҳақида атрофлича фикр алмашилди.

Қарорга асосан Сурхондарё вилоятида ОИВ инфекцияси тарқалишига қарши курашиш учун фаол ёшлар олиб борадиган тизимли тарғибот тадбирлари консепциясини амалга оширишнинг “йўл харитаси” тасдиқланди. Унда 2025 йилгача ОИВ инфекцияси эпидемиясига барҳам беришнинг аниқ чора-тадбирлари белгилаб олинган. Кадрлар ресурсларини сафарбар этиш, инфекциянинг ижтимоий, молиявий, тиббий, маънавий-ахлоқий жиҳатлари билан боғлиқ муаммоларни ҳал этиш масалаларига комплекс ёндошиш кўзда тутилган. Алоқадор ташкилотларга муайян вазифалар юклатилган.

–“Йўл харитаси”ни самарали амалга ошириш учун тегишли чора-тадбирлар ишлаб чиқилди, – дейди Сурхондарё вилояти ОИТСга қарши курашиш маркази бош шифокори, ҳудудий ишчи гуруҳ раҳбари Нурмамат Норбоев. – Масалан, аҳолининг барча қатлами, шу жумладан, қишлоқ аҳолисининг ОИВ инфекциясидан хабардорлик даражасини ошириш учун ҳар бир маҳаллада энг фаол ёшлардан икки-уч нафарини ўқитиб, волонтёр тайёрлаймиз. Улар ўз ҳудудидаги аҳоли ва ёшлар ўртасида тарғибот-тушунтириш ишларини олиб боради. Инфекцияга қарши курашишда белгиланган ҳар бир бандни амалга оширишнинг ана шундай янги механизмларидан фойдаланилади. ОИВ қўрқадиган, сесканадиган эмас, ҳар бир киши ҳимояланадиган касаллик эканини ёшу-кексага чуқур тушунтириш учун ёшларга, ишчи гуруҳ ва кенг жамоатчиликка ҳам таянамиз.

Йиғилишда “Йўл харитаси”да белгиланган топшириқларни муддатида бажариш ва ОИВ инфекциясига қарши курашиш йўллари юзасидан таклиф ва тавсиялар билдирилди. Ишчи гуруҳ аъзоларини қизиқтирган саволларга жавоб берилди.

Холмўмин МАМАТРАЙИМОВ, ЎзА мухбири