Навоий вилоят Санитария-эпидемиологик осойишталик ва жамоат саломатлиги бошқармаси ташаббуси билан ОИТСга қарши курашиш маркази, Журналистлар уюшмаси вилоят бўлими, АОКА вилоят бошқармаси ҳамкорлигида матбуот анжумани ташкил этилди.

Унда Ўзбекистон Республикаси Президентининг 2023 йил 20 январдаги “Одамнинг иммунитет танқислиги вируси келтириб чиқарадиган касалликка қарши курашиш тизимини янада кучайтириш чора-тадбирлари тўғрисида”ги қарори ижросини таъминлаш, “95-95-95” стратегияси доирасидаги ишлар, ОИВ профилактикаси, ОИВ инфекцияси билан боғлиқ стигматизация ва дискриминациянинг олдини олиш бўйича тадбирлар ўтказиш динамикаси тўғрисида сўз юритилди.  

– Бирлашган Миллатлар Ташкилотининг Бош Ассамблеяси томонидан 2030 йилга бориб ОИВ эпидемиясига барҳам бериш учун “95-95-95” стратегияси илгари сурилган бўлиб, унинг доирасида ОИВ инфекциясини юқтириб олган шахсларнинг 95 фоизи ўз мақомини билишлари, махсус даволаш курслари билан қамраб олиниши, 95 фоизининг қонида вирус юкламаси аниқланмайдиган даражага тушиши кераклиги таъкидланган, – дейди ОИТСга қарши курашиш маркази директори А.Рўзиев. – Шунингдек, Президент қарорида ОИВ инфекциясининг онадан болага юқишига барҳам берилишини таъминлаш, никоҳланувчи шахсларни ОИВ инфекцияси бўйича мажбурий тиббий кўрикдан ўтказиш жараёнини электрон тизим орқали амалга ошириш ҳамда “Электрон ҳукумат” тизимининг идоралараро интеграция платформаси орқали ФҲДЁ органлари ва тегишли тиббиёт муассасалари ўртасида электрон ҳамкорликни ташкил қилиш белгиланган. Бугунги кунда текшириш ишлари мазкур тизим орқали амалга ошириб келинмоқда.  

Матбуот анжуманида таъкидланганидек, вилоятда мавжуд даволаш-профилактика муассасаларида ётиб даво муолажаларини  олган беморларнинг 81 минг 688 нафари ОИВ инфекциясига текширувдан ўтказилган.  

2024 йилнинг 11 ойи ҳолатига вилоят аҳолиси орасида ОИВ инфекциясининг аниқланиши ҳар 100 минг аҳоли сонига нисбатан 4,5 фоиз кўрсатгични ташкил этмоқда. Таҳлилларга кўра, бу кўрсатгич ўтган йили 4,7 фоизни ташкил қилган.  

[gallery-20988]

Аҳолига қулайликлар яратиш ва кўрсатилаётган тиббий хизмат сифатини янада ошириш мақсадида Хатирчи туманидаги ОИВ диагностика лабораторияси янгидан қурилиб, барча керакли тиббий жиҳозлар билан таъминланди. Келгусида эса Қизилтепа туманидаги ОИВ диагностика лабораториясида қайта таъмирлаш ишлари олиб борилиши режалаштирилган.  

Матбуот анжуманида ОАВ вакиллари, журналистлар ўзларини қизиқтирган саволларига тегишли тартибда жавоб олди.   

А.Бўриев, С.Аслонов (сурат), ЎзА мухбирлари