"Euronews" АҚШ Президенти Дональд Трамп сайлов олди кампаниясида Украинадаги урушни бор-йўғи 24 соат ичида ва ҳатто лавозимга киришишидан олдин тугатиши мумкинлиги ҳақида бир неча бор мақтанганини яна эслатиб, бу баёнот бўрттирилган даъво эканини таъкидлаган.

Оммавий ахборот воситаларидан бирига берган интервьюсида Америка етакчиси ўша ваъдаси юзасидан такрор сўроққа тутилди, чунки унинг маъмурияти орадан деярли икки ой ўтган бўлса-да, ҳамон урушни тугатишга ечим топа олмади.

Қўшма Штатларнинг 47-президенти эса россиялик ҳамкасби Владимир Путиндан “яхши кайфият” олганини айтиб, тинчликни “ҳақиқатан хоҳлаётгани” учун уни олқишлаш билан чекланди. Сўзи якунида келишув яқин орада бўлишига ишонишини билдирди.

Мусулмон Зиё, ЎзА