Ertaga Saudiya Arabistonining Jidda shahrida og‘ir atletika bo‘yicha o‘smirlar o‘rtasida jahon chempionati boshlanadi.

Mazkur musobaqada mamlakatimiz sharafini 9 nafar atlet himoya qiladi. Xususan, musobaqada Ashrafxon Abdujamilov, Husinboy Matrasulov, Qudratbek Salimjonov, Diyorbek Ermatov va Qurbonmurod Namozov o‘g‘il bolalar o‘rtasidagi bahslarda, qizlar o‘rtasida esa Ozoda Hojiyeva, Sevinch Komilova, Nigora Suvonova hamda Madina Jo‘rayeva supaga chiqadi.

Yosh sportchilarimiz dunyo birinchiligida Nurillo Tog‘ayev va Jo‘ra Zoirov qo‘l ostida bahslarga kirishadi. Ushbu chempionat yosh atletlarimiz uchun kelgusi yili bo‘lib o‘tadigan musobaqalar oldidan munosib tayyorgarlik vazifasini o‘tab beradi.

Chempionat 12 oktyabrga qadar davom etadi.

Javohir TOSHXO‘JAEV, O‘zA