“Fajr Cup” халқаро турнирининг илк кунида иштирок этган тўрт нафар спортчимизнинг барчаси шоҳсупага кўтарилди.

Эрон пойтахти Теҳрон шаҳрида оғир атлетика бўйича ўтаётган “Fajr Cup” халқаро турнирининг илк кунида Жўрабек Заиров мураббийлигидаги терма жамоамиз аъзолари юртимиз шарафини муносиб ҳимоя қилди.

Хусусан, -65 кг. вазн тоифасида супачага кўтарилган истеъдодли спортчимиз Диёрбек Одилов 3 та кумуш медални қўлга киритди. -71 кг. вазн тоифасида иштирок этган Ҳусинбой Матрасулов даст кўтаришда 143, силтаб кўтаришда эса 162 кг. натижа қайд этди. Иккикураш якунига кўра, 305 кг. оғирликни ўзига бўйсундирган полвонимиз 3 та кумуш медалга эга чиқди.

Спортчиларимизнинг муваффақиятли иштирокини Ҳайитбой Абдушукуров муносиб давом эттирди. Ёш оғир атлетикачимиз -79 кг вазн тоифасида даст кўтаришда 147 кг. натижа билан барча рақибларини ортда қолдириб, олтин медаль соҳиби бўлди. Силтаб кўтаришда 174 кг. натижа кўрсатган Ҳайитбой ушбу йўналишда бронза медалига эгалик қилди. Иккикураш якунига кўра, спортчимиз 321 кг. натижа билан яна бир бронза медали билан тақдирланди.

Ҳамюртларимизнинг бугунги беллашувларини яна бир ёш полвонимиз Бекзод Ғофуржонов юқори нотада якунлаб берди. Бекзод -88 кг. вазн тоифасида даст кўтаришда 156 кг. натижа билан шоҳсупанинг энг юқорисидан жой олиб, терма жамоамизга яна бир олтин медални тақдим этди. Силтаб кўтаришда 185 кг, иккикураш якуни бўйича умумий 341 кг. натижа кўрсатиб, иккита кумуш медаль соҳибига айланди.

Бугун, 28 ноябрь куни халқаро турнирнинг сўнгги кунида терма жамоамиз аъзоларидан Муҳаммадқодир Тоштемиров совринли ўринлар учун кураш олиб боради.

Т.Рўзиев,

ЎзА