Саудия Арабистонида давом этаётган VI Ислом бирдамлиги ўйинларининг оғир атлетика баҳслари поёнига етди.

Хўш, мамлакатимиз полвонлари Ислом бирдамлиги ўйинларининг бу галги мусобақаларида кўзланган натижага эришдими? Истакларимиз натижаларга мос келдими?

Ўйинларда Ўзбекистон терма жамоасининг 10 нафар спортчиси беш кунлик оғир атлетика баҳсларида 6 та олтин, 9 та кумуш ва 5 та бронза медалини қўлга киритиб, умумжамоа ҳисобида етакчилардан бири эканини намойиш этди.

Эътиборга молик жиҳатлардан яна бири, мусобақада қатнашган йигитларимизнинг барчаси 100 фоизлик натижа кўрсатди, яъни 5 нафар полвоннинг ҳар бири шоҳсупага кўтарилди.

Адҳамжон Эргашев икки йиллик танаффусдан сўнг халқаро майдонга қайтиб, делегациямиз ҳисобига олтин, кумуш ҳамда бронза медалларини совға қилди.

Нигора Абдуллаева илк бор иштирок этган Ислом бирдамлиги ўйинларида бирданига 3 та кумуш медални қўлга киритди.

Ёш спортчимиз Диёрбек Рўзметов делегациямиз ҳисобини кумуш медаль билан бойитди.

Тажрибали полвонимиз Сарварбек Зафаржонов 2 та олтин ва 1 та кумуш медаль соҳибига айланди. Шу тариқа, Сарварбекнинг Ислом бирдамлиги ўйинларидаги умумий натижаси 5 та олтин ва 1 та кумуш медални ташкил этмоқда. Бу кўрсаткич Акбар Жўраевдан кейин энг юқори натижа ҳисобланади.

Қизларимиздан Ригина Адашбаева ва Турсуной Жабборова ҳам қитъа миқёсида етакчилар қаторида эканликларини кўрсатиб, 3 тадан кумуш ва бронза медалини ўз номларига ёздириб қўйди.

Жаҳон оғир атлетикасининг энг номдор спортчиларидан бири саналган Акбар Жўраев кутилганидек бу гал ҳам рақибларига имкон қолдирмади. 3 та олтин медалга эгалик қилган Жўраевнинг Ислом бирдамлиги ўйинларидаги медаллари сони 6 тага етди ва уларнинг барчаси олтин! Бу, Ўзбекистон спорти тарихидаги энг юқори натижа ҳисобланади.

Айтиш лозим, оғир атлетикачиларимиз бундан уч йил муқаддам Туркияда ўтган V Ислом бирдамлиги ўйинларида 15 та медални қўлга киритган эди. Жорий йилда эса бу кўрсаткич 5 та медаль ҳисобига янада яхшилангани эътиборли.

Бугунгача Ўзбекистон спорт делегациясининг умумий медаллари сони 46 тани ташкил этаётган бўлса, уларнинг 20 таси оғир атлетикачиларимиз ҳиссасига тўғри келаётгани таҳсинга сазовор воқелик.

Бу кўрсаткичлар юртимизда бошқа спорт турлари қатори оғир атлетика изчил ривожланаётгани, мураббийлар, спортчилар, мутахассисларнинг фидокорона меҳнати маҳсули, дейиш мумкин.

Т.Рўзиев,

ЎзА