Жанубий Кореяда давом этаётган қитъа чемпионатининг бугунги куни мамлакатимиз спорт жамоаси учун омадли кечди.

Оғир атлетикачимиз Руслан Нуруддинов яна бир бор қитъа чемпионатининг тенгсиз спортчиси эканлигини исботлади.  

109 килограмм вазн тоифасида чемпионлик учун баҳс олиб борган спортчимиз даст кўтариш машқида 177 килоли тошни буйсундирган бўлса, силтаб кўтаришда 228 килограмм натижа қайд этди ва ҳақли равишда олтин медалларга эга чиқди.  

Ўзбекистон номини жаҳон спорт майдонларида улуғлаб келаётган Руслан иккикураш натижасига кўра, 405 килограмм кўрсаткич билан энг яқин таъқибчисини 6 килога ортда қолдиришга эришди ҳамда ушбу вазн тоифасида барча рақибларидан устун эканлигини яна бир карра намойиш этди.  

Унинг ғалабаси шарафига чемпионатда ватанимиз байроғи юксалиб, мадҳиямиз баралла янгради.  

Эртага, 13 май куни "Париж-2024" Олимпиадасига муҳим рейтинг балларини тақдим этадиган қитъа чемпионатининг сўнгги кунида аёллар ўртасида +87 кило оғирликда ҳамда эркаклар ўртасида +109 кило вазнда баҳcлар ташкил этилади.  

Унда мамлакатимиз оғир атлетикачиларидан Турсуной Жабборова, Акбар Жўраев ва Руслан Жангабоев медаллар учун кураш олиб боришади.  

Эслатиб ўтамиз, мазкур қитъа чемпионатида Осиёнинг 35 та давлатидан 300 нафарга яқин спортчи иштирок этмоқда.  

Т.Рўзиев, ЎзА