Бугун, 4 декабрь куни Қатарда оғир атлетика бўйича "Париж-2024" Олимпиадаси учун қимматли рейтинг очколарини тақдим этадиган Гран-при турнири бошланди.

Нуфузли мусобақа олдидан Халқаро оғир атлетика федерацияси ижроия қўмитасининг йиғилиши ўтказилди.  

Йиғилишда яқин вақт ичида оғир атлетика бўйича ўтадиган йирик мусобақаларга мезбонлик қиладиган давлатлар белгилаб олинди. Эътиборлиси, Халқаро оғир атлетика федерацияси ижроия қўмитаси аъзоларининг овоз бериши натижасида Тошкент шаҳри 2025 йили ёшлар ўртасида ўтадиган жаҳон чемпионати мезбонлигини қўлга киритди.  

Қайд этиш жоиз, 2018 йили ёшлар ўртасидаги жаҳон чемпионати пойтахтимизда юқори савияда ўтказилганди.  

2026 йилги катталар ўртасидаги дунё биринчилиги Хитойнинг Нинбо шаҳрида ўтадиган бўлди.  

Катталар ўртасидаги 2024 йилги жаҳон чемпионати Баҳрайнда, 2025 йилгиси эса Норвегияда ташкил этилиши расман тасдиқланди.  

Қатар Гран-присининг биринчи кунида терма жамоамиз аъзоларидан Жамила Панфилова иштирокини бошлайди. 49 килограмм вазн тоифасига эга атлетимиз “В” гуруҳида ўз омадини синаб кўради.  

Эслатиб ўтамиз, 14 декабрга қадар давом этадиган Қатар Гран-при турнирида мамлакатимиз шарафини шунингдек, Достон Ёқубов, Муҳаммадқодир Тоштемиров, Сарвар Зафаржонов, Рустам Жангабоев, Регина Адашбоева каби спортчиларимиз ҳимоя қилмоқда.  

Т. Рўзиев, ЎзА