Хитойда ишлаб чиқарилган янги авлод одамсимон роботи мамлакат шарқидаги икки йирик шаҳар — Сучжоу ва Шанхай орасидаги 106 километрдан ортиқ масофани тўхтамасдан босиб ўтиб, Гиннеснинг янги жаҳон рекордини ўрнатди. Бу ҳақда Чина Даилй Асиа нашри хабар берди.

Рекорд эгаси бўлган Агибот А2 роботи Шанхайда жойлашган технологик компания томонидан яратилган. У 10 ноябрь куни кечаси Сучжоудан йўлга чиқиб, 13 ноябрь тонгида Шанхайнинг машҳур Вайтан қирғоғига етиб келган. Роботнинг энг муҳим устунликларидан бири — аккумуляторларни тезкор алмаштириш технологияси бўлиб, айнан шу тизим унга бирор марта тўхтамасдан 106 км 286 метр масофани босиб ўтиш имконини берган.

Агибот А2 мураккаб шароитларда мустақил ҳаракатлана олиши билан ҳам ажралиб туради. У илғор сенсорлар, кўп функцияли камералар ва реал вақт режимида атроф-муҳитни таҳлил қилувчи алгоритмлар билан жиҳозланган. Ҳаракат давомида робот светофорлар, тор пиёдалар йўлаклари, гавжум тротуарлар, кўприклар ва турли йўл қопламаларидан ўтиб, барча йўл ҳаракати қоидаларига риоя қилган.

Шанхайга етиб келгач, рекордчи робот журналистлар билан қисқа “мулоқот”да ўз саёҳатини “машина ҳаётидаги унутилмас тажриба” деб атаган, ҳаттоки ҳазиллашиб “менга энди янги туфли керак бўлиши мумкин”, деган.

Мутахассислар ушбу ютуқни Хитойнинг гуманоид роботлар соҳасидаги катта қадамларидан бири сифатида баҳоламоқда. Агибот А2'нинг узоқ масофани босиб ўтиш бўйича муваффақияти роботларни хизмат кўрсатиш, хавфсизлик, етказиб бериш, қутқарув ишлари ва мониторинг каби соҳаларда янада кенг қўллаш учун йўл очиши мумкин.

<iframe width="560" height="315" src="https://www.youtube.com/embed/5R2SEGKxuso?si=VNqhAlDTte_lrth3" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Улуғбек Тўхтаев, ЎзА