9 декабрь – Халқаро коррупцияга қарши курашиш куни муносабати билан Бухоро вилояти божхона бошқармасининг “Бухоро ТИФ” божхона постида жамоатчилик вакиллари ҳамда тадбиркорлик субъектлари иштирокида очиқ эшиклар куни ташкил этилди.

Тадбирда мамлакатимизда коррупцияга қарши курашиш йўналишида амалга оширилаётган ислоҳотлар, шунингдек, божхона органлари фаолиятида шаффофлик ва очиқликни таъминлашга қаратилган тизимли чора-тадбирлар юзасидан атрофлича маълумотлар берилди. 

Бугунги кунда вилоятда 3 та чегара ва 2 та ташқи иқтисодий фаолият божхона постлари фаолият юритмоқда. Уларда қарийб 220 нафар божхона ходимлари давлатимизнинг иқтисодий хавфсизлигини таъминлашдек масъулиятли вазифани адо этмоқда. Жорий йилнинг ўтган даври мобайнида 54 маротаба коррупциянинг олдини олишга қаратилган турли профилактик тадбир ва учрашувлар ташкил этилган бўлиб, уларнинг аксарияти ходимлар билан бир қаторда уларнинг оила аъзолари иштирокида ўтказилгани билан аҳамиятлидир. 

Шунингдек, учрашувда божхона тизимида рақамлаштириш жараёнларини жадаллаштириш, электрон хизматларни кенг жорий этиш орқали инсон омилини қисқартириш, коррупция хавфини камайтириш ҳамда жамоатчилик назоратини кучайтириш бугунги кунда энг устувор вазифалардан бири экани қайд этилди.

Очиқ эшиклар куни ана шу йўналишларда олиб борилаётган ишлар ҳақида жамоатчиликни хабардор қилиш, давлат органлари ва фуқаролар ўртасидаги ишончни мустаҳкамлашга хизмат қилгани билан муҳим аҳамият касб этди.

Зариф Комилов, ЎзА мухбири.