Аслида ОАВ вакиллари учун уюштириладиган пресс-тур, матбуот анжуманлари манфаатли ҳамкорлик учун ташкил этилади. Журналистлар учун "чиғириқдан ўтказиш"га янги мавзу, ҳамкорга эса фаолияти тарғиботига керак бўладиган муҳим тадбир бўлади.

Давлат хизматини ривожлантириш агентлиги Навоий вилояти бошқармасида бу борада янгича ёндашув йўлга қўйилган. Пресс-конференция, брифинг, пресс-тур ва масофадан туриб онлайн шаклдаги мулоқотлар тизимдаги шаффофлик ва холис хизматни жамоатчиликка етказиш мақсадини кўзлайди.

Томди туманида давлат хизматлари маркази халқ фойдаланишига топширилди. Бу вилоятдаги тизимнинг саккизинчи тармоғидир. Мазкур бинонинг тадимот маросимида жамоатчилик билан бирга ОАВ вакиллари, блогерлар ва мустақил журналистлар иштирок этди. Ҳеч бир бинонинг архитектураси ва кўриниши, дизайни бир-бирига ўхшамайди. Тўғри, барчасида хизмат кўрсатиш, кутиш зали, қабул ойналари, тўлов учун касса, кафетерий, тиббиёт хонаси, болалар майдончаси мавжуд. Аммо, 8 та бўлимнинг ҳам интерьери шу бинога кирадиган одамларда илиқ таассурот уйғотиши рост. Барчаси фуқароларнинг қулай ва шинам бинода давлат хизматидан фойдаланиши учун яратилган.

15 минг нафарга яқин аҳоли истиқомат қилувчи Томди туманида ҳам 2020 йилда 5 мингдан ортиқ давлат хизмати кўрсатилган, жорий йилда эса мингга яқин фуқаро марказ имкониятларидан фойдаланган, бу хизматларни олишда аввалги бино аҳоли учун тор ва ноқулай эди. Эндиликда бир вақтнинг ўзида 10 та қабул ойнаси мавжуд шинам ва замонавий бинода халққа хизмат кўрсатиш тизим ходимлари учун ҳам қулай. Пресс-тур давомида айни мсаълумотлар берилди.

Марказдаги экстерриториал тамойил ва дипломлар нострификацияси бўйича кўрсатиладиган хизмат тури ташкил этилгани жуда фойдали эканлиги таъкидланди.

Шунингдек, ОАВ вакиллари марказ биносининг иккинчи қаватидаги туман адлия ва ФҲДЁ бўлими, нотариус, халқ ва бош вазир қабулхоналари офислари билан танишди.

Нодира Самандарова,

ДХА Навоий вилояти бошқармаси етакчи маслаҳатчиси.

ЎзА