Туркия Президенти Режеп Таййип Эрдоған сайловларни муддатидан олдин, яъни жорий йилнинг кузида ўтказиши мумкин, деб хабар бермоқда Германияда чиқадиган Welt am Sonntag нашри Европа ташқи ҳаракатлар хизмати ва ЕИ дипломатлари манбаларига таяниб.

Туркияда келгуси Президент ва парламент сайловлари 2023 йил июнь ойига мўлжалланган. "Президент Эрдоған сайловларни шу йили, кузда ўтказиши мумкинлигига бир нечта аломатлар бор. Сайлов яқин истиқболда бўлиши мумкин", – деб ёзмоқда нашр.

Аниқлик киритилишича, муддатидан аввал Президент сайловини ўтказиш сабабларининг бири Туркия иқтисодиётида кузатилаётган қийинчилик ёзда туризмдан тушган даромадлар ҳисобига барҳам топиши мумкинлигидир. Бу аҳолининг кайфияти яхшиланишига сабаб бўлади.

Нашр Туркия статистика бошқармаси эълон қилган маълумотларни келтирар экан, апрелдан июнгача сайёҳликдан 8,7 миллиард доллар фойда кўрилганини айтади. Бу ўтган йилнинг шу даври билан солиштирганда 190 фоизга кўпдир.

Шу билан бирга, газетанинг таъкидлашича, валюта курсининг яхши эмаслиги натижасида энергия маҳсулотларининг қимматлаб кетиши табиийки, истеъмолчиларга, яъни сайловчиларга айниқса қиш вақтида салбий таъсир кўрсатиши мумкин.