Буюк Британия ташқи ишлар вазири Лиз Трасс агар бош вазирликка сайланса Буюк Британиянинг энергетика хавфсизлигини таъминлаш учун Шимолий денгизда янги газ конларини ўзлаштиришга бир қатор лицензиялар беришга ваъда қилди, деб ёзмоқда Times газетаси.

Нашрнинг  таъкидлашича, ушбу рухсатномалар Трасс бош вазир этиб сайлангандан кейинги энг биринчи қарорларидан бўлиши мумкин. Шунингдек, газетанинг ёзишича, Консерватив партиянинг юқори лавозимли аъзолари, жумладан, Буюк Британиянинг энергетика вазири Кваси Квартенг ҳам мамлакат ичкарисида энергия захираларини оширишга ҳамда Норвегиядан қўшимча газ жалб қилишга ҳаракат қилмоқда.  

Газетанинг ёзишича, Трасс газ қазиб олиш ва газ конларини тадқиқ учун камида 130 та  лицензия бериши мумкин. Бироқ экспертларнинг фикрича, ушбу чора Буюк Британияда электр энергия нархини тез фурсатда арзонлаштира олмайди.