Июль ойининг ўрталарида истеъфога чиқиб мамлакатни тарк этган Шри-Ланканинг собиқ президенти Готабая Ражапакса яқин кунларда Шри-Ланкага қайтади, деб ёзди сешанба куни Daily Mirror газетасининг интернет-версияси ҳукумат берган маълумотга таяниб.

Готабая Ражапаксага Сингапур 14 июль куни 14 кунлик қисқа муддатли виза берган эди. У дастлаб Шри-Ланкадан Малдивга, ундан Сингапурга келганди. Берилган визанинг муддати яна икки кундан кейин тамом бўлади, деб ёзмоқда мазкур нашр.

13 июль куни Шри-Ланкада норозилик намойишлари авжига чиқди, натижада мамлакат президенти мамлакатни тарк этишга мажбур бўлди ва хориждан электрон почта орқали парламентга истеъфо бериши ҳақидаги мактубини жўнатди. Шри-Ланка мухолифатчиларининг аксарият қисми Ражапакса ва унинг хонадони вакилларини 2022 йилда мамлакатда юз берган чуқур иқтисодий инқирознинг асосий айбдори, демоқда.