Франция президенти Эммануэль Макроннинг Гренландияга ташрифи Оқ уй раҳбари Дональд Трампнинг G7 саммитини муддатидан олдин тарк этишига сабаб бўлди, деб ёзмоқда “Financial Times” газетаси.

Якшанба куни Макрон Гренландиянинг маъмурий маркази Нуукга ташриф буюрди. Шу билан у Дания таркибига кирувчи оролга ташриф буюрган биринчи хорижий давлат раҳбари бўлди.

Хабарларда таъкидланишича, АҚШ президенти шунчаки G7 дан чарчаган ва “самарали нарса” устида ишлашни давом эттирмоқчи бўлган. Шу боис Трамп сешанба куни режалаштирилган тадбирларга қарамай саммитни  эрта тарк этган.

“Axios” порталининг ёзишича, Трамп кечқурун Миллий хавфсизлик кенгаши билан Исроил ва Эрон ўртасидаги можаро бўйича йиғилиш ўтказган.

Маълумки, Трамп президентликка келишидан олдин ҳам Гренландия Қўшма Штатлар таркибига кириши кераклигини бир неча бор таъкидлаган эди. 1953 йилгача Гренландия Даниянинг мустамлакаси бўлган ва шу кунгача қиролликнинг бир қисми бўлиб қолмоқда. 2009 йилда у ўзини ўзи бошқариш ва ички сиёсатда мустақил танлаш имкониятини берувчи мухториятга айланди.

С.Раҳимов, ЎзА