Испания қуролли кучларида мамлакат армиясининг жанговар қобилиятини қўллаб-қувватлаш учун яна 20 минг нафар ҳарбий хизматчи керак, дейилади чоршанба куни El Periódico газетаси эълон қилган мақолада.

Айни дамда Испания қуролли кучлари қуруқликдаги қўшинлари шахсий таркиби учун 12 минг кишига эҳтиёж сезмоқда, шунингдек, ҳарбий-ҳаво кучлари учун 5,7 минг ва ҳарбий-денгиз кучлари учун 4 минг аскар ҳамда 2,7 минг фуқаро керак бўлмоқда.

Нашрнинг ёзишича,  энг оғир вазият қиролликнинг  ҳарбий-ҳаво кучларида сезилмоқда, чунки қўшинларнинг бу турида, айниқса ихтисослашган персоналларга талаб катта. Масалан, Испанияда Eurofighter  қирувчи самолётларни бошқара оладиган атиги 21 нафар учувчи бор.

Ҳозирда Испанияда ҳарбий хизматчилар ва денгизчилар сони 79 минг кишини ташкил этади ва ушбу рақам 2014 йилдан буён ўзгармай келмоқда.

Октябрь ойи бошида Испаниянинг коалицион ҳукумати 2023 йил учун давлат бюджети лойиҳасини маъқуллади. Унда 12,3 миллиард евро мудофаа учун ажратилгани кўрсатилган. Бу 2022 йил билан солиштирганда 20,5 фоизга кўпдир.