ОАВ: Ҳиндистон шимолида 13 нафар аёл қудуққа йиқилиб ҳалок бўлгани айтилмоқда
Ҳиндистоннинг Уттар-Прадеш штатидаги қишлоқда камида 13 нафар аёл қудуққа йиқилиб ҳалок бўлган, яна уч нафари жароҳат олган.
The Indian Express газетасининг пайшанба кунги сонида ёзилишича, фожиа чоршанба куни кечаси Кушинагар туманида тўй маросими пайтида содир бўлган. Маросимда иштирок этган аёлларнинг бир гуруҳи қудуқ қопқоғи устидан ўтирган бўлган. Одамлар бир жойга тўпланиши оқибатида қудуқ қопқоғи синиб кетган ва аёллар чуқур қудуққа тушиб кетган.
Фожиа натижасида қудуқ ичида 11 аёлнинг жони узилгани, яна икки нафари касалхонада вафот этгани айтилмоқда. Айни пайтда шифокорлар қолган уч аёлнинг жонини сақлаб қолишга ҳаракат қилмоқда.
Ҳиндистон бош вазири Нарендра Моди Twitter орқали ҳалок бўлганларнинг оила аъзоларига ҳамдардлик билдириб, жароҳат олганларга тезроқ соғайиб кетиш тилагини изҳор этган.