Финляндия билан Швеция келаси ҳафта бир вақтнинг ўзида НАТОга ариза ташлаши мумкин, деб ёзмоқда Helsingin Sanomat газетаси ишончли манбаларга таяниб.

"Финляндия билан Швеция НАТОга аъзо бўлиш учун аризани келаси ҳафтанинг бошида бир вақтда ташлайди", - деб ёзди мазкур нашр.

Аввалроқ Финляндия президенти Саули Ниинистё НАТОга аъзолик масаласида фикрини 12 майда эълон қилиши ҳақида хабар тарқалган эди.

Хабарда айтилишича, Финляндия раҳбари 17-18 май кунлари Швецияга ташриф буюриб мамлакат бош вазири Магдалена Андерссон билан музокара ўтказади. Музокараларда муҳокама этиладиган мавзу  Финляндия билан Швециянинг хавфсизлик бўйича олиб бораётган сиёсатига бағишланади.

Маҳаллий матбуотнинг ёзишича, икки давлат раҳбарлари Шимолий Альянсга қўшилиш бўйича қарорини биргаликда эълон қилади.