Озарбайжон Президенти Илҳом Алиев ва Арманистон бош вазири Никол Пашинян Қорабоғ бўйича тинчлик битимини 1 июнда Молдовада бўлиб ўтадиган Европа сиёсий ҳамжамияти саммитида имзолаши мумкин, деб хабар тарқатди Рейтер агентлиги Озарбайжоннинг Франциядаги элчиси Лайло Абдуллаева берган маълумотига таяниб.

“Биз 1 июнь куни Кишинёвда тинчлик шартномаси имзоланишига умид қилмоқдамиз. Бу қўлдан чиқариб бўлмайдиган тарихий имкониятдир”, – деган Абдуллаева.

Агентликнинг дипломатик манбаларга таяниб хабар беришича, саммит пайтида Пашинян ва Алиев Франция Президенти Эммануэл Макрон ва Германия канцлери Олаф Шольц билан музокара ўтказади.

РИА Новостининг ёзишича, жума куни РФ Президенти матбуот котиби Дмитрий Песков яқин келажакда Арманистон билан Озарбайжон ўртасида тинчлик шартномаси имзоланиши мумкинлигини айтган.