Буркина-Фасода исён кўтарган ҳарбийлар 2015 йилда давлат тўнтаришини амалга оширишда айбланиб қамалган генерал Жильбер Дьендерени озод қилди, деб хабар тарқатди LSI Africa портали.

Бундан аввалроқ мазкур нашр мамлакат президенти Роша Марк Каборе оиласи билан Буркина-Фасони тарк этгани ҳақида хабар тарқатган эди. Оммавий ахборот воситаларининг ёзишича, ҳарбийлар президентнинг истеъфосини талаб қилган.

Хабарларда келтирилишича, президентни жандармерия кучлари қўриқлаб турибди.

Гувоҳларнинг ОАВга маълум қилишича, якшанба куни оқшом пайти президент қароргоҳи яқинида отишма овозлари эшитилган, шунингдек, осмонда вертолёт кўринган.

Ғарбий Африка давлатлари иқтисодий ҳамжамиятининг минтақавий блоки (ЭКОВАС) ҳарбийларни "республикачилик позициясини" сақлашга ва ҳукумат билан мулоқотни қўллаб-қувватлашга чақирган.

RFI радиостанцияси эса якшанба куни эрталаб Буркина-Фасо пойтахтида жойлашган иккита ҳарбий қисмда тўхтовсиз отишмалар эшитилиб тургани ҳақида хабар берди. Отишмаларнинг бири 2015 йилда давлат тўнтаришини амалга оширишда айбланган генерал Жильбер Дьендере сақланаётган қамоқхонада эшитилган. Маҳаллий ОАВ отишмалар Кая шаҳрида ҳам эшитилганини ёзишмоқда.

Ҳукумат ҳам пойтахтда отишма содир бўлганини тасдиқлаган, бироқ армия ҳокимиятни эгаллагани ҳақидаги хабарни рад этган.

Мамлакат мудофаа вазири Бартелеми Симпоре президент қўлга олингани ҳақидаги хабарни рад этиб, мамлакатда вазият назорат остида эканини айтган.

Дунё бўйича интернет фаолиятини таҳлил қилиб борадиган NetBlocks ташкилотининг маълум қилишича, мамлакатда давлат тўнтариши амалга оширилди, деган хабар тарқалгач, интернет ўзиб қўйилган.

Ҳозирча воқеалар ривожи қандай кечиши номаълумлигича қолмоқда, дейилади хабарда.