Mazkur yoʻnalishda sezilarli siljish 2019-yilda yuz berdi
“Yuksalish” umummilliy harakati mutaxassislari Ijtimoiy va iqtisodiy tashabbuslari instituti xodimlari bilan hamkorlikda bugungi kunda davlat tuzilmalari, muassasalari hamda yirik jamoat tashkilotlarida faoliyat yuritayotgan ayollarning “Top-35” roʻyxatini tuzdi va bu yaxlit fotosuratda aks ettirildi.
Aytib oʻtish kerakki, Oʻzbekistonda gender tengligi masalasi bugungi kunda “taqiqlangan mavzular” roʻyxatidan chiqarildi.
Mazkur yoʻnalishda sezilarli siljish 2019-yilda yuz berdi. Xalqaro xotin-qizlar kuni arafasida Gender tenglikni taʼminlash boʻyicha komissiya tuzildi.
Uch oy oʻtgach (2019-yil 21-iyun) mustaqil Oʻzbekiston tarixida ilk bor Oliy Majlis Senati raisi (lavozim darajasiga koʻra mamlakatdagi ikkinchi odam) lavozimida Tanzila Narbayeva faoliyat boshladi.
Va sentyabr oyida ikki muhim qonun —“Xotin-qizlar va erkaklar uchun teng huquq hamda imkoniyatlar kafolatlari toʻgʻrisida” va “Xotin-qizlarni tazyiq va zoʻravonlikdan himoya qilish toʻgʻrisida”gi qonunlar kuchga kirdi.
Ayollarning roli va mavqei, siyosiy-ijtimoiy hayotda ularning faolligi ortganligini yaqinda boʻlib oʻtgan parlament saylovlari natijasiga koʻra Qonunchilik palatasi deputatlarining 32 foizi ayollardan iborat ekanligi ham bunga yarqin misoldir. Bu koʻrsatgich 2014-yilga nisbatan ikki baravar koʻp demakdir.
Yuqorida qayd etilgan, “Top-35” roʻyxatidan joy olgan xotin-qizlar ishlayotgan tashkilotlarining siyosiy kun tartibini shakllantirish, sohalarni rivojlantirish hamda ijtimoiy-iqtisodiy oʻzgarishlarni amalga oshirishga institutsional taʼsir darajasi inobatga olingan.