Oʻzbekiston zamonaviy beshkurash federatsiyasi Frankfurtda muzokara olib bordi
Mamlakatimizda yaqin vaqt ichida Oʻzbekiston zamonaviy beshkurash maktabi ochiladi.
19 yanvar kuni Frankfurt shahrida Oʻzbekiston zamonaviy beshkurash federatsiyasi raisi Baxromjon Gaziyev va Zamonaviy beshkurash xalqaro ittifoqi prezidenti doktor Klaus Shormanning uchrashuvi boʻlib oʻtdi.
Uzoq muddatli va oʻzaro manfaatli munosabatlarni rivojlantirish masalasi muhokama qilingan uchrashuvda Baxromjon Gaziyev Oʻzbekiston zamonaviy beshkurashining holati va istiqbollari haqida batafsil soʻzlab berdi.
Muloqotda taʼkidlanganidek, koʻp yillardan buyon mamlakatimizda ushbu sport turiga yetarlicha eʼtibor berilmagan va shuning uchun rivojlana olmagan edi. Biroq, hozirda vaziyat oʻzgardi.
-Oʻzbekiston zamonaviy beshkurash federatsiyasi va Milliy olimpiya qoʻmitasining birgalikdagi saʼy-harakatlari natijasida qisqa vaqt ichida kuchli murabbiylar va bir nechta iqtidorli sportchi topishga muvaffaq boʻldik va Tokio 2020 Olimpiadasida ishtirok etish uchun haqiqiy imkoniyatlar paydo boʻldi, – dedi Baxromjon Gaziyev.
Klaus Shormann, oʻz navbatida, Oʻzbekiston zamonaviy beshkurashini rivojlantirish va ommalashtirishga yordam berishga vada berdi.
Uchrashuvda Oʻzbekiston sportchilarini zarur jihozlar bilan taʼminlash va sport majmualarini mashgʻulotlari uchun zamonaviy uskunalar bilan jihozlash masalalari ham muhokama qilindi.
Klaus Shormann mamlakatimizda ushbu sport turini rivojlantirish borasida oʻz tavsiya, takliflarini bergan boʻlib, ular Oʻzbekiston zamonaviy beshkurash federatsiyasining kelajakdagi harakatlarini rejalashtirish uchun asos boʻlib xizmat qiladi.
Mamlakatimizda yaqin vaqt ichida Oʻzbekiston zamonaviy beshkurash maktabi ochiladi. Rejaga binoan qilichbozlik zali, suzish havzalari, yugurish yoʻlaklari, stadionlar, konkur maydoni va oʻq otish uchun moʻljallangan maydonlarni oʻz ichiga olgan, xalqaro standartlarga mos zamonaviy sport bazasi quriladi. Kelgusida ushbu sport bazasida nafaqat zamonaviy beshkurash, balki boshqa sport turlari boʻyicha ham xalqaro musobaqalar oʻtkaziladi.
Oʻzbekiston zamonaviy beshkurash federatsiyasi raisi ish rejasidagi navbatdagi qadam Osiyo zamonaviy beshkurash konfederatsiyasi prezidenti Sangvo Park bilan uchrashuvdir. Hozirgi vaqtda uchrashuvning aniq sanasi, joyi va vaqtini belgilash boʻyicha muzokaralar olib borilmoqda.