Kutilganidek oʻyin nominal mezbon “Lokomotiv”ning keskin hujumlari bilan boshlandi. 7-daqiqada temiryoʻlchilar hujumchisi Temurxoʻja Abduxoliqov raqib darvozasini ishgʻol etgandi, ammo bu vaziyatda hujumchi oʻyindan tashqari holatda qolgani bois gol inobatga olinmadi.

Biroq Temurxoʻja baribir oʻz maqsadiga erishdi. 12-daqiqada Zoteyevning chap qanotdan jarima maydoniga kirib kelishi gol bilan yakunlandi. Olegning pasidan keyin Abduxoliqov osonlik bilan darvozani ishgʻol qildi - 1:0.

Shundan keyin ham tashabbus “Loko” tomonida boʻldi va ular raqibni bosim ostida ushlab turdi. Birgina Temurxoʻjaning oʻzida hisobni oshirish uchun yetarlicha imkoniyatlar boʻldi, ammo unga aniqlik yetishmadi.

Maydon markazida ustunlik raqibga berib qoʻyilgani bois Mirjalol Qosimov birinchi boʻlimdayoq oʻzgarish qildi: Mirolyub Kostich oʻz oʻrnini yurtdoshi Marko Zochevichga boʻshatib berdi.

Jamoalar tanaffusga 1-0 hisobida chiqib ketdi.