АҚШ, ЕИ ва Канада Украинадаги вазият туфайли Россия олмосларига “қонга ботган” деган мақом беришга чақирмоқда, деб ёзмоқда New York Times газетаси Америка давлат департаменти вакили Жорж Кажатининг Кимберли жараёни раисига жўнатган мактубига таяниб.

Кимберли жараёни 80 дан зиёд мамлакатни ўзида бирлаштиради. Ташкилот 2000 йилда ташкил этилган бўлиб, Жанубий Африка Республикасининг Кимберли шаҳри номи билан аталган. Мазкур шаҳарда “қонли олмослар”га қарши кураш бўйича илк конференция бўлиб ўтган эди. “Қонли олмослар”, деб ноқонуний қазиб олинган қимматбаҳо тошларни айтишади. Уларнинг савдосидан тушган маблағлар минтақавий можаролар ва террорчи гуруҳларни молиялаштиришга йўналтирилади.

Газетанинг ёзишича, июнь ойида Ботсванада бўлиб ўтган Кимберли жараёни йиғилишида РФ олмослари ҳақидаги масала кўтарилган. Бироқ Россия, Хитой ва Беларусь ушбу масалага вето қўйгандан кейин муҳокама тўхтатилган.

Нашрнинг ёзишича, АҚШ Россиянинг ишлов берилмаган олмосларини импорт қилишни тақиқлаган, бироқ Россия бриллиантлари барибир мамлакатга кириб бормоқда. Газетанинг таъкидлашича, Россия олмосининг кўп қисми Ҳиндистонда қайта ишланиб, ушбу мамлакатга тегишли олмос сифатида АҚШ бозорига кириб келмоқда.