Айни истакдаги хотин-қизларга қандай ёрдам кўрсатилади?

Навоий вилоятида аҳоли,  хусусан,  аёллар бандлиги,  касб-ҳунарга ўқитилиши алоҳида эътиборда.  

Нурота туманида ҳам “Аёллар дафтари”га киритилган хотин-қизларни тадбиркорлик ва кичик бизнесга кенг жалб этиш мақсадида ташкил этилган махсус ўқув курсини тугатган хотин-қизларга Сертификатлар топширилди.

Вилоят Хотин-қизлар тадбиркорлик маркази ташаббуси билан ташкил этилган курслар хотин-қизларнинг ўз мустақил  ишини бошлаши учун илк ва асосий ҳуқуқий-меъёрий тушунчалар беришга хизмат қилди.

Юртимизда аҳоли, биринчи ўринда ёшлар ва хотин-қизларнинг бандлигини таъминлаш, тадбиркорлик фаолиятини кенг қўллаб-қувватлаш, қулай имтиёз ва енгилликлар берилмоқда.

Навоий вилоятида ҳам бу борада аниқ мақсадлар асосида иш ташкил этилиб, хотин-қизлар бандлигини таъминлаш борасида чора тадбирлар режаси белгиланган.

Туманда хотин-қизларни “Аёллар дафтари”га рўйхатга олиш жараёнида 376 нафар хотин-қиз тадбиркорлик фаолиятини бошлаш ва 152 нафари қайта касб-ҳунарга ўқиш истагини билдирган эди.

Натижада вилоят Хотин-қизлар тадбиркорлик маркази томонидан 70 нафар хотин-қиз қайта касбга ўқитилди.

– Бугун ўз олдимга аниқ мақсад қўйиб бошладим, – дейди ўқув курси битирувчиси Муаттар Болтаева. – Шу кунга қадар вақтинча уйда ишсиз эдим. Туман хотин-қизлари учун ташкил этилган бепул ўқув курсларига қатнаб, ўз фаолиятимни бошлаш истаги пайдо бўлди. Ўқув курсида ўқиш давомида тадбиркорлик фаолиятини юритиш, уни йўлга қўйиш борасида бошланғич маълумотларга эга бўлдим.

Вилоят Хотин-қизлар тадбиркорлик маркази томонидан ҳудудларда “Аёллар дафтари”га киритилган хотин-қизларни касбга ўқитиш жараёни давом этмоқда.

Абдували Бўриев, ЎзА