Qoraqalpog‘iston Respublikasi Jo‘qorg‘i Kengesidagi O'zLiDeP fraksiyasi a’zosi Bahodirjon Sidiqov tashabbusi bilan Nukus shahridagi “Amudaryo”, “Jiydeli baysun”, “Anasay” va “Samanbay” mahalla fuqarolar yig‘inlaridagi 40 nafardan ziyod nuroniylar Buxoro va Samarqand shaharlariga sayohat qildi.
Keksalarni e’zozlash, ularga hurmat-ehtirom ko‘rsatish xalqimizga xos ezgu fazilatlardan biri hisoblanadi. “Inson qadri uchun” tamoyili asosida olib borilayotgan islohotlar yurtimiz bo‘ylab keng quloch yoydi. Ko‘z o‘ngimizda bo‘layotgan o‘zgarishlar, xalq farovonligi yo‘lida qilinayotgan bunyodkorlik ishlari, ko‘ngilni yashartiradi. Xalqimiz nuroniy faxriylarni hamisha hurmat qilib, ehtirom ko‘rsatib kelgan.
Tadbirni tashkil etishdan maqsad ichki turizmni rivojlantirish, keksa avlod vakillariga hurmat va ehtirom ko‘rsatish, ularni har tomonlama qo‘llab-quvvatlashdan iborat. Sayohat davomida nuroniylar Buxoro va Samarqand shaharlarining tarixi, madaniy meroslari, madaniyati bilan yaqindan tanishib, ziyorat qildi.
Yoshi ulug‘ onaxon va otaxonlar ko‘rsatilayotgan e’tibor uchun davlatimizga o‘z minnatdorligini bildirdi.
Dovud ABIBULLAEV, O‘zA muxbiri