Jahon matbuoti sahifalarida
KAZINFORM axborot agentligi – Nur-Sultonda Xalqaro Turk akademiyasi tomonidan nashr etilgan Nizomiy Ganjaviy, Alisher Navoiy va Yunus Emro kitoblarining taqdimoti bo‘lib o‘tdi. Xalqaro Turk akademiyasi mashhur sanalarga bag‘ishlab “Sharq yulduzlari” anjumanini o‘tkazdi.
Unda qayd etilganidek, 2021 yil turk olamining ko‘plab mamlakatlari uchun muhim sana bo‘ldi. Joriy yilda Nizomiy Ganjaviy tavalludining 880-yilligi, Alisher Navoiy tavalludining 580-yilligi, Yunus Emro vafotining 700-yilligi nishonlandi. Akademiya tashabbusi bilan ushbu allomalarning ko‘plab asarlari bir necha tillarda nashr etildi. Yunus Emroning she’rlari kitobi ilk marotaba qozoq tilida chop etildi. Shuningdek, joriy yilda qadimgi turk tiliga tarjima qilingan ming yillik Qur’on kitobi ham qaytadan nashr etildi.
Xalqaro Turk akademiyasi ko‘magida taniqli turk shoiri Yunus Emroning asarlari ilk marotaba alohida to‘plam sifatida nashr etildi. Akademiya Alisher Navoiyning ozarbayjon tiliga tarjima qilingan she’rlari to‘plamini ham tayyorladi. Kitobni taniqli ozarbayjon olimi, professor Ramiz Askerov tarjima qildi. Shu bilan birga, Alisher Navoiyning “Muhokamat-ul-lug‘atayn” asari ham ilk marotaba qozoq tiliga tarjima qilindi va nashr etildi.
x x x
AQSH Xalqaro taraqqiyot agentligi O‘zbekiston sog‘liqni saqlash vazirligiga 30 ta apparat taqdim etdi.
AQSH Xalqaro taraqqiyot agentligi O‘zbekiston xalqiga sil kasalligini aniqlashga mo‘ljallangan apparatlar to‘plamini hadya qildi. Respublika ixtisoslashtirilgan ftiziatriya va pulmonologiya ilmiy-amaliy tibbiyot markazida Agentlikning O‘zbekistondagi missiyasi direktori Mikaela Meredit 381 ming AQSH dollariga teng uskunalarni O‘zbekiston Sog‘liqni saqlash vaziri o‘rinbosari Ulug‘bek Sobirovga topshirdi.
AQSH Xalqaro taraqqiyot agentligi tomonidan taqdim etilgan sil kasalligini molekulyar-genetik darajada aniqlashga asoslangan va yuqori tezlikda ishlaydigan va ishlatishda qulayligi bilan ajralib turadigan ushbu innovatsion texnologiya endi O‘zbekistonda ham mavjud.
Muqobili bo‘lmagan ushbu apparatlar birlamchi tibbiy-sanitariya yordami tarmog‘idagi ishlarni ancha osonlashtirib, mutaxassislarga sil kasalligini tezkor va aniq tashxislashga yordam beradi.
Mikaela Meredit marosida so‘zga chiqib, “Biz O‘zbekiston rahbariyatining 2050 yilgacha sil kasalligiga barham berish bo‘yicha sa’y-harakatlarini yuqori baholaymiz, “2021-2026 yillarga mo‘ljallangan va 2025 yilda kasallikni 50 foizga, o‘lim holatlarini 75 foizga kamaytirishga qaratilgan Sil kasalligiga qarshi kurashish bo‘yicha Milliy strategiyasi” bundan dalolatdir”, - dedi. Taqdim etilgan uskunalar tuman bakteriologiya laboratoriyalariga sil kasalligini o‘z vaqtida diagnostika qilish xizmatlarini kengaytirish va O‘zbekiston aholisining zamonaviy tezkor testlardan foydalanish imkoniyatlarini yaxshilashga yordam beradi.
x x x
“Suv resurslari ekspertlari dasturi”ning ikkinchi sessiyasi
AQSH Ichki ishlar vazirligi Amerikaning Toshkentdagi elchixonasi bilan hamkorlikda suv resurslarini boshqarish masalalariga bag‘ishlangan ikkinchi sessiyani o‘tkazdi. Unda Toshkent irrigatsiya va qishloq xo‘jaligini mexanizatsiyalashtirish muhandislari instituti, Irrigatsiya va suv muammolari ilmiy-tadqiqot instituti, Suv resurslari vazirligi, Qishloq xo‘jaligi vazirligi va O‘zbekiston Kosmik tadqiqotlar va texnologiyalar agentligi vakillari ishtirok etdi.
Sessiya AQSH Qishloq xo‘jaligi vazirligining Tabiiy resurslarni muhofaza qilish xizmati xizmati vakili Brent Dreyperning “Kamchil sug‘orish” mavzusidagi taqdimoti bilan boshlandi. Muhandis Dreyper oddiy suv solingan stakanlar yordamida O‘zbekistonda sersuv va suv taqchil bo‘lgan mavsumlarda suv resurslaridan qanday foydalanish, hosildorlikni oshirish va suv taqchil mavsumlarda suvni tejash maqsadida qanday qilib almashlab ekish, o‘ta quruq sharoitda ekinlarni qanday saqlash usullarini ko‘rsatib berdi.
Uchrashuvda shunindek, kanallar yotqizish bilan suv resuralarini boshqarish, suv tashilishini yaxshilash, gidroenergetika bilan aloqalar hamda muayyan mahalliy va hududiy ehtiyojlar uchun irrigatsiya tarmoqlarini modernizatsiya qilishning ahamiyati haqida ma’lumotlar berildi. Ayni damda modernizatsiya qilish loyihalarida davlat-xususi sherikchiligining o‘rni chuqur tahlil qilinib, bu borada AQSH da amaliyotda qo‘llangan aniq loyihalarga misollar keltirildi.
x x x
Bizning “Jahon matbuoti sahifalarida” nomli yangi ruknimizga oid tilaklaringiz, taklif va fikr-mulohazalaringizni pochta@uza.uz manziliga yuborishingizni so‘raymiz.
I.Abdumalikzoda tayyorladi, O‘zA