Nukusdagi karantin zonasidan qochgan qoraqalpogʻistonlik fuqaro Buxoro viloyatida ushlangani maʼlum qilingan edi.

Qoraqalpogʻiston Respublikasi prokuraturasi ushbu vaziyat boʻyicha rasmiy maʼlumot berdi:

“2020-yil 19-mart kuni “Moskva-Toshkent” yoʻnalishidagi poyezd orqali Rossiya Federatsiyasidan Oʻzbekiston Respublikasiga kirib kelgan Buxoro viloyati, Shofirkon tumanida yashovchi fuqaro Sh.R (1990-y.t.) Nukus temir yoʻl bekatida yangi turdagi COVID-19 koronavirus kasalligiga gumon qilinib, Nukus shahridagi Respublika bolalar sanatoriyasiga yotqizilib, karantinga joylashtirilgan.

Biroq, fuqaro Sh.R 2020-yil 21-mart kuni epidemiyaga qarshi kurashish qoidalarini buzib, oʻzboshimchalik bilan karantin zonasidan qochib ketganligi aniqlangan.

Olib borilgan tezkor-qidiruv harakatlari natijasida fuqaro Sh.R Buxoro viloyati, Shofirkon tumanida ushlanib, tumandagi maxsus tibbiyot birlashmasiga joylashtirilgan.

Mazkur holat yuzasidan 2020-yil 21-mart kuni fuqaro Sh.R ga nisbatan Qoraqalpogʻiston Respublikasi IIV huzuridagi Tergov boshqarmasi tomonidan Oʻzbekiston Respublikasi JKning 25,257-1-moddasi 1-qismi (Sanitariyaga oid qonun hujjatlarini yoki epidemiyaga qarshi kurash qoidalarini buzish) bilan jinoyat ishi qoʻzgʻatilib, gumon qilinuvchi protsessual tartibda ushlandi.

Hozirgi kunda tergov harakatlari olib borilmoqda”.