Berdaq nomidagi Qoraqalpoq davlat akademik musiqali teatrida O‘qituvchi va murabbiylar kuniga bag‘ishlangan tantanali tadbir bo‘lib o‘tdi. Unda Qoraqalpog‘iston Respublikasi Jo‘qorg‘i Kengesi Raisi A.Orinbayev yig‘ilganlarni kasb bayrami bilan qutladi.

Ta’kidlanganidek, 2022-2026 yillarda xalq ta’limi tizimini rivojlantirish bo‘yicha Milliy dastur asosida mamlakatimizda keng ko‘lamli ishlar amalga oshirilmoqda. Joriy yilda davlat byudjeti hisobidan barcha zamonaviy sharoitlarga ega yangi maktab bunyod etilib, ularning moddiy-texnik bazasi mustahkamlanmoqda. Jumladan, ta’lim maskanlari qo‘shimcha o‘quv jihozlari to‘plami, zamonaviy kompyuterlar bilan ta’minlandi.

[gallery-8984]

Prezidentimizning bayram munosabati bilan mamlakatimiz o‘qituvchi va murabbiylariga yo‘llagan tabrigini xalqimiz katta qiziqish bilan qabul qildi. Tabrikda qayd etilgan “bugungi kunda fidoyi ustoz va murabbiylarning ezgu xizmatlari tufayli yoshlarimiz har tomonlama barkamol bo‘lib voyaga yetayotgani, fan va texnika, madaniyat va san’at, sport sohalarida qanday katta marralarni qo‘lga kiritayotgani barchamizga quvonch baxsh etadi”, degan so‘zlar ularning mehnatiga berilgan yuksak e’tirofdir.

Tadbirda soha fidoyilariga Qoraqalpog‘iston Respublikasi faxriy unvonlari, ko‘krak nishonlari tantanali ravishda topshirildi. Tantanali tadbir san’at ustalari konserti bilan yakunlandi.

Dovud Abibullayev, Maqsad Habibullayev (surat), O‘zA