“Mega Nukus” кўнгилочар савдо мажмуаси олдида Шимоли-ғарбий ҳарбий округ ҳарбий хизматчилари томонидан “Ватанпарварлик – миллий юксалиш кафолати!” шиори остида ватанпарварлик фестивали ўтказилди.

Бу ҳақда Шимоли-ғарбий ҳарбий округ матбуот хизмати ЎзАга маълум қилди.

Нукус гарнизони Маънавият ва маърифат маркази ҳарбий оркестри ҳамда ташаббускор ижодкор ҳарбийлар томонидан ижро этилган куй ва қўшиқлар йиғилганларда ватанпарварлик туйғулари янада жўш уришини таъминлади. Оркестр садоларининг жонли оҳангидан томошабинлар ҳаяжонга келиб, унутилмас онларни телефонига муҳрлай бошлади.

– Хўжайлидан келдим, – деди “Хоразм лазги”сини мароқ билан тинглаётган Мунаввар Эшжонова. – Ҳарбийлар томонидан ўтказилаётган концертда илк маротаба қатнашяпман. Тўғрисини айтсам, ҳаяжондаман. Ватанимизни ҳимоя қилаётган ҳарбийлар бир қўлида қурол, бир қўлида соз билан халқимизнинг тинчлигини таъминлаб, кўнглини олиши таҳсинга сазовор. Чекка туман ва қишлоқларда ҳам ҳарбийлар билан учрашувлар кўпроқ ташкил этилишини истардим.

Ўзбекистон Республикасининг 2019 йил 5 сентябрдаги “Хавфсизлик ва мудофаа соҳасидаги қонун ҳужжатлари такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонунининг 3-моддасига мувофиқ, “Ҳарбий қасамёд” матни “Ватанга қасамёд” матнига ўзгартирилган эди. Фестиваль доирасида ҳарбий хизматчилар йиғилганларга “Ватанга қасамёд” матнини етказишди.

Фахрий қоровул взводи ва муддатли ҳарбий хизматчилар томонидан тайёрланган қўл жанги элементларидан иборат кўргазмали чиқишлар даврага ўзгача шукуҳ бағишлади.