18 ноябрь – Ўзбекистон Республикаси Давлат байроғи қабул қилинган сана муносабати билан “Миллий тикланиш” демократик партияси Қорақалпоғистон Республикаси Кенгаши ташаббуси билан Шимоли-ғарбий ҳарбий округининг Нукус гарнизонида маънавий-маърифий тадбир ташкил этилди.

“Бир Ватан, бир эл, бир байроқ!”  шиори остида ўтказилган тадбирда Қорақалпоғистон Республикаси Жўқорғи Кенгеси депутати Ольга Ниязова сўзга чиқиб, давлат байроғининг яратилиш тарихи, унинг мустақиллик рамзи сифатидаги ўрни ҳамда жамиятда юксак фуқаролик онгини шакллантиришдаги аҳамиятига тўхталиб ўтди.

Таъкидланганидек, байроғимиз давлатимиз суверенитетининг рамзидир. У халқимизнинг шонли тарихи ва эзгу интилишларини ўзида мужассам этиб, тинч ва осойишта, эркин ҳаётимиз, ёруғ келажагимизга бўлган ишончимизнинг тимсоли саналади.  

Тадбирда фаол иштирок этган ҳарбий хизматчиларга эсдалик совғалари топширилди.

Тадбир якунида концерт дастури намойиш этилиб, йиғилганларга байрамона кайфият улашилди.

Довуд Абибуллаев, ЎзА мухбири