Иннавацион риаожланиш вазирлиги Матбуот хизмати маълум қилишича, Ўзбекистон ҳамда Хитой олимлари ҳамкорлигида яратилган "ZF-UZ-VAC2001" вакцинасининг Ўзбекистон ва бошқа давлатларда ўтказилган 3-фаза синовлари натижалари тиббиёт соҳасидаги нуфузли журналлардан бири – "The New England Journal of Medicine"да чоп этилди.

Мақола ўзбек в хитой олимларининг тенг ҳаммуаллифлигида ёзилган бўлиб , "ZF-UZ-VAC2001" вакцинасининг самарасини ўрганиш ва хавфсизлигини тасдиқлаш мақсадида олиб борилган плацебо-назорат тадқиқотининг натижаларига бағишланади.

"ZF-UZ-VAC2001" вакцинаси тадқиқотларининг 3-фазаси Ўзбекистон, Хитой, Индонезия, Покистон ва Эквадор давлатларидаги 31 та клиника марказларида ўтказилиб, унда жами 29 мингга яқин кўнгилли иштирок этган. Ушбу синовда қатнашганлар 1:1 нисбатда вакцина ёки плацебо қабул қилишган. 12 625 нафар вакцина олган кўнгилилар гуруҳида 158 та COVID-19 инфекциясига чалиниш ҳолатлари, 12 568 нафар плацебо қабул қилган кўнгиллилар гуруҳида эса 580 та COVID-19 ҳолатлари аниқланган. Натижада вакцинанинг самарадорлиги 75,7 фоизни ташкил қилган. Шунингдек, вакцинанинг COVID-19 касаллигининг оғир ва ўта оғир ҳолатларидан ҳамда ўлим ҳолатларидан сақлаш кўрсаткичи мос равишда 87,6 фоиз ҳамда 86,5 фоизни ташкил қилган.

Ножўя таъсирларнинг 98,5 фоизи 1-ёки 2-даражада кечганлиги аниқланган. Ўз навбатида вакцинага алоқадор ўлим ҳолатлари кузатилмаганлиги қайд этилган. Мақолада "ZF2001" вакцинасининг COVID-19 ҳолатларининг симптомсиз ҳамда оғир ва ўта оғир формаларининг олдини олишда самарали ҳамда хавфсиз эканлигини таъкидланади. Шундай қилиб, "ZF-UZ-VAC2001" вакцинаси тўлиқ эмлангандан сўнг камида олти ой давомида коронавирус симптоми ва ўткир шакллари билан касалланишнинг олди олинади.

Қайд этиш жоизки, "NEJM" журнали 1812 йилдан бери чоп этилади. Журнал 2021 йилги илмий журнал рейтингига 91 импакт фактор (ИФ)га эга бўлиб, етакчи илмий журналларнинг энг олдинги учлигига киради: 1-ўринда «CA-A Cancer Journal for Clinicians» (IF=508,7); 2-ўринда «Nature Review Molecular Cell Biology» (ИФ=94,4): 3-ўринда NEJM (ИФ=91,2); 4-ўринда «Nature Reviews Drug Discovery» (ИФ=84,7); 5-ўринда «Ланцет» (ИФ=79,3). NEJM дунёнинг 175 та мамлакатига тарқатилади.

Ўз навбатида Инновацион ривожланиш вазирлиги мазкур тадқиқотда иштирок этган фуқароларимизга, илмий жамоаларга ва тиббиёт ходимларига ўз миннатдорчилигини билдиради, дейилади хабарда.

Моҳигул Қосимова, ЎзА