Мутахассислар COVID-19га қарши ҳозирча бир маротаба бустер доза вакцина олишни таклиф қилмоқда. Мабодо пандемия узоқ вақт давом этгудек бўлса, бустер дозага бир неча маротаба мурожаат қилиниши ҳам мумкин.

Шуни такидлаш керакки, бустер доза вакцинадан фойдаланиш амалиёти тиббиётда анчадан бери мавжуд бўлиб, республикамизда шол, қизамиқ, қизилча, бўғма каби қатор юқумли касалликлар вакцинопрофилактикаси жараёнида қўлланилган.

Мутахассисларнинг фикрича, бустер доза вакцина билан эмланиш коронавируснинг “альфа”, “дельта” штаммларидан ташқари “омикрон”дан ҳам ҳимоя қила олади. Мабодо касаллик юқса ҳам, у жиддий асоратларсиз, енгил ўтиб кетади.

– Ушбу соҳадаги халқаро экспертларнинг фикрича, вақт ўтиши билан эмлангандан кейин ҳосил бўлган антитаначалар камая бошлайди. Ҳар қандай шахс вакцинанинг 2 ёки 3 дозасини олганидан сўнг унинг организмида COVID-19га қарши антитаначалар пайдо бўлади ва маълум вақт ўтгандан сўнг уларнинг миқдори камайиб боради. Бустер доза билан қўшимча (қайта) эмланиш эса бирламчи эмланишдан кейин ҳосил бўлган иммунитет даражасини қисқа муддатда кўтариб беради, – дейди Санитария-эпидемиологик осойишталик ва жамоат саломатлиги хизмати директори ўринбосари Нурмат Отабеков. – Демак, бустер доза орқали сусайиб бораётган иммун тизимини қайтадан барқарор ҳолатга келтириш мумкин.

ЎзА