Бухоро вилояти божхона бошқармаси “Хўжадавлат” темир йўл чегара божхона пости орқали юртимизга олиб келинган контейнер ўрнатилган тартибда божхона назоратидан ўтказилди.

Ҳужжатларга кўра контейнерда 24 тонна 500 килограмм оғирликдаги  протеин, косметика маҳсулотлари ва газламалар олиб келинган. Бироқ ўтказилган текширув натижасида контейнерда ҳужжатларда кўрсатилганидан ортиқча ҳамда ҳужжатларда умуман кўрсатилмаган 24 турдаги товарлар, шу жумладан, парфюмерия ва косметика маҳсулотлари, маиший техника ва мебеллар, озиқ-овқат ва кийим-кечаклар борлиги аниқланди. Мазкур товарларнинг умумий қиймати 13 миллиард 679 миллион сўмни ташкил қилади. 

Ҳозирда юқоридаги ҳолат юзасидан божхона органлари томонидан суриштирув ҳаракатлари олиб борилмоқда.

Зариф Комилов, ЎзА