Бухоро вилояти божхона бошқармасининг “Олот” чегара божхона пости ходимлари томонидан умумий қиймати 216 миллион сўмлик товарларнинг ноқонуний айланмасига чек қўйилди.

Унда хорижий йўналишда ҳаракатланиб “Олот” чегара божхона постига кириб келган юк автотранспорт воситаси “Z-Portal” қурилмаси ёрдамида сканердан ўтказилди.

Бирламчи божхона назорати давомида мазкур товарларнинг рентген тасвирлари таҳлил қилинди. Натижада юк кузатув ҳужжатларида кўрсатилмаган буюмлар борлиги божхона ходимларида шубҳа уйғотган. Шундан сўнг, тегишли  тартибда божхона кўригидан ўтказилган.

Кўрик натижасида умумий қиймати 216 миллион сўмлик товарлар яъни юк кузатув ҳужжатларида қайд этилмаган тахминий қиймати 39 миллион сўмлик, жами 26 дона чангютгичлар ва ҳужжатларда кўрсатилгандан ортиқча бўлган, қиймати 177 миллион сўмни ташкил этувчи 59 дона генераторлар борлиги ўз тасдиғини топди.  

Айни пайтда ушбу ҳолат юзасидан терговга қадар суриштирув ҳаракатлари олиб борилмоқда.

Зариф Комилов, ЎзА