Қурилиш ва уй-жой коммунал хўжалиги соҳасида назорат қилиш инспекциясининг Навоий вилояти ҳудудий назорат қилиш инспекцияси томонидан ўтказилган рейд давомида Навоий шаҳридаги кўп қаватли турар-жой биносида жиддий қонунбузарлик ҳолати аниқланди.

Ўрганиш давомида хонадон эгаси томонидан бинонинг юк кўтарувчи деворлари бузиб ташлангани маълум бўлди. Бундай ҳаракат бинонинг конструктив барқарорлигини издан чиқариб, унинг сейсмик хавфсизлигига жиддий путур етказган. Бу эса унда яшовчи юзлаб фуқароларнинг ҳаёти ва соғлиғи учун реал хавф туғдиради.

– Навоий шаҳар Маҳмуд Торобий кўчасидаги кўп қаватли уйда яшовчи хонадон эгаси ўз хонадонини таъмирлаш вақтида ичимлик суви ва оқова сув қувурларини юк кўтарувчи деворларни пастки қисмини ўйиб, монтаж ишларини олиб борган, – дейди инспекция масъул ходими Достон Жўраев. – Бу уйнинг сейсмик ва техник ҳолатига жиддий хавф солади. Ҳолат бўйича инспекция томонидан фуқарога мажбурий кўрсатма берилиб, Маъмурий жавобгарлик тўғрисидаги кодекснинг тегишли моддасига асосан жавобгарликка тортилди.

Ҳудудий назорат қилиш инспекцияси ходимлари томонидан фуқаролар хавфсизлигини таъминлаш ва ноқонуний ўзгартиришларнинг олдини олиш борасидаги назорат ишлари давом эттирилмоқда.

<iframe width="640" height="420" src="https://www.youtube.com/embed/ozb8nwrbOUI" title="Noqonuniy o‘zgartirish – xavf manbai" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

А.Бўриев, ЎзА мухбири