Тошкент вилояти божхона бошқармаси мутахассислари томонидан жойларда қонунбузарликларни олдини олиш чораларини кўрмоқда.

2025 йил таҳлилларга кўра, бошқарма томонидан ҳуқуқни муҳофаза қилувчи бошқа органлар билан ҳамкорликда гиёҳванд воситаларининг ноқонуний муомаласига қарши кураш йўналишида 59 та ҳолатда 195,4 килограммдан зиёд гиёҳвандлик воситаларининг ноқонуний айланмасига чек қўйилди. 

Бундан ташқари, товар-моддий бойликларнинг ноқонуний айланмасига қарши курашиш йўналишида 4 минг 650 та ҳолатда 144,5 миллиард сўмга тенг товарлар ушлаб қолинди. Аниқланган ҳуқуқбузарлик ҳолатлари бўйича 51,5 миллиард сўм қўшимча божхона тўловлари ҳисобланди.

Жумладан, бошқармага қарашли “С.Нажимов” чегара божхона пости ходимлари томонидан Контрабандага қарши курашиш тезкор тузилмалари ҳамда Қибрай тумани Давлат хавфсизлик хизмати ходимлари билан ҳамкорликда божхона назорати тадбирлари амалга оширилди.

Юртимизга ўтиш учун келган фуқаро бошқарувидаги юк автотранспорт воситаси божхона назоратидан ўтказилди. Унда автотранспорт юкхонасида юклар орасига яширилган, оғзаки сўровда маълум қилинмаган ҳамда юк кузатув ҳужжатларида кўрсатилмаган жами 827 дона электрон тамаки воситалари аниқланди.

Шунингдек, яна бир ҳолатда “Навоий” чегара божхона пости орқали пиёда ҳолда кириб келган фуқаронинг қўл юклари белгиланган тартибда текширилганида, унга тегишли қўл юклари ичида оғзаки сўровда маълум қилинмаган ва декларацияланмаган хорижда ишлаб чиқарилган 400 дона “VELO” номли тамаки маҳсулотлари борлиги фош этилди.

Ҳозирда мазкур ҳолатлар юзасидан дастлабки текширув ҳаракатлари олиб борилмоқда.

А.Мусаев, ЎзА.