“Ногиронлиги бўлган шахсларнинг ҳуқуқлари тўғрисида”ги қонунга қўшимча ва ўзгартиришлар киритилди.

Қонунга киритилган қўшимча ва ўзгартиришларга кўра, давлат ногиронлиги бўлган шахслар учун бошқалар билан тенг равишда одил судловдан фойдаланиш имкониятини таъминлайди.    

Шу жумладан, суд процессининг барча босқичларида, шунингдек, суриштирув ва дастлабки тергов босқичларида ногиронлиги бўлган шахсларнинг қонунда белгиланган тартибда бевосита ёки билвосита иштирок этишини таъминлашга қаратилган чораларни кўради.  

Ногиронлиги бўлган шахсларнинг мамлакат ижтимоий-сиёсий ҳаётида бевосита ёки ўз вакиллари орқали иштирок этиши, шу жумладан, қонунда белгиланган тартибда сайлаш ва сайланиш, референдумларда иштирок этиш ҳуқуқи таъминланади.  

Давлат сайлов участкаларида (референдум участкаларида) ногиронлиги бўлган шахсларнинг барча тоифалари, шу жумладан, эшитиш, кўриш бўйича ногиронлиги бўлган, ўриндиқли аравачалардан фойдаланувчи шахслар овоз бериши учун зарур шарт-шароитлар яратилишини таъминлайди.  

Илгари бундай нормалар мавжуд эмас эди.  

Бундан ташқари, ногиронлиги бўлган шахслар билан мулоқот қилиш учун қулай мулоқот шаклларини, шунингдек, ижтимоий инфратузилма объектларини ногиронлиги бўлган шахсларнинг уларга монеликсиз кириши учун мослаштириш асосларини белгиловчи нормалар билан тўлдирилди.    

Ушбу ўзгаришларни назарда тутувчи қонун расмий эълон қилинган кундан эътиборан кучга киради.  

Н.Абдураимова,  

ЎзА