Буюк Британиянинг Лондон шаҳрида шахмат бўйича бошланган “WR Chess Masters-2024” турнирининг бу йилги мусобақаларида дунёнинг 16 нафар маҳоратли гроссмейстери қаторида ҳамюртларимиз Нодирбек Абдусатторов ва Жавоҳир Синдоров ҳам ғолиблик учун кураш олиб бормоқда.

Кеча мусобақанинг 1/16 финал баҳслари бўлиб ўтди. Илк босқичда Нодирбек Абдусатторов аёллар ўртасида 12-жаҳон чемпиони, ҳозирда Швейцария шарафини ҳимоя қилаётган Александра Костенюк билан рўбарў келди. Тенг курашлар остида ўтган ўйинда Абдусатторов кичик устунлик эвазига турнирнинг 1/8 босқичига йўл олди.  

Ушбу босқичда Жавоҳир Синдоров франциялик Максим Вашье-Лаграв билан куч синашди. Ўтказилган иккита партияда дуранг натижа қайд этилган бўлса, бир партияда Синдоров имкониятни бой бериб қўйди. Бу эса франциялик  Вашье-Лагравни кейинги босқичга олиб чиқди.  

Бугун, 15 октябрь куни “WR Chess Masters-2024” турнирининг 1/8 босқичидаги баҳсда Нодирбек Абдусатторов франциялик Максим Вашье-Лаграв билан баҳс олиб боради.  

Мукофот жамғармаси 58 минг евродан иборат “WR Chess Masters-2024” турнири 18 октябрга қадар давом этади.  

Т.Рўзиев,

ЎзА