Чехияда ўтаётган “Prague International Chess Festival 2026” халқаро турнири “Masters” гуруҳи 5-турида амалдаги жаҳон чемпиони Гукеш Доммараджуни мағлуб этган ҳамюртимиз Нодирбек Абдусатторов учрашувни ўта мураккаб ва назорат қилиш қийин бўлган ўйин сифатида баҳолади.

– Дебютга у жуда яхши тайёрланган экан. Назаримда, илк юришларда, ҳаракатларда позицияларимиз тенг эди. Гукеш жуда кучли юришлар билан баҳсни давом эттирди. Аввалига ҳаммаси жойидагидек туюлганди. Аммо қанча кўп ўйласам, вазият шунча  ёқмай бошлади. Шунинг учун бошқача юришларни амалга оширдим ва вақт назоратини ҳам эътибордан қочирмадим. Айнан шу жиҳатга эътибор қаратишим ҳамда у вақт ҳолатида чегараланганлиги натижасида 6-турга ғалаба билан ўтаётганлигим кайфиятимга ижобий таъсир кўрсатмоқда, – деди Н.Абдусатторов ўйиндан сўнг журналистларга берган интервьюсида.

Бугун, 3 март куни “Prague International Chess Festival 2026” турнирининг 6-турида ҳамюртларимиз Нодирбек Ёқуббоев ва Нордирбек Абдусатторов рўбарў келади.

Шунингдек, ушбу турда “Masters” гуруҳида 4 очко билан пешқадамлик қилаётган нидерландиялик Жорден ван Форест оқ доналарда чехиялик Давид Навара билан, Гукеш Доммараджу ҳамюрти Аравиндх Читхамбарам билан, испаниялик Антон Дэвид эронлик Пархам Магсудлу билан, АҚШ вакили Ханс Ниманн германиялик Винсент Кеймер билан куч синашади.

Т.Рўзиев,  

ЎзА