“Prague International Chess Festival-2024" турнири ғолиби бўлган Нодирбек Абдусатторов Чехияда меҳнат қилаётган ҳамда таҳсил олаётган ватандошларимиз билан учрашди.

Ўзбекистонлик гроссмейстер Нодирбек Абдусатторов Чехия пойтахти Прага шаҳрида ўтказилган шахмат бўйича “Prague International Chess Festival-2024" халқаро турнирининг чемпиони бўлди.

Рапид йўналиши бўйича жаҳон чемпиони Нодирбек Абдусатторов 27 февралдан 7 мартгача давом этган халқаро турнирда 8 та давлатнинг 10 нафар гроссмейстери қаторида ғолиблик учун курашди.

Кеча мусобақанинг сўнгги 9-турида ҳамюртимиз Ричард Раппортга қарши дона сурди. Шиддатли ўтган ўйин 0,5:0,5 ҳисобида дуранг билан якунланди. Бу, Абдусатторовнинг турнирни 6,5 очко билан нуфузли халқаро турнир ғолиблигини мустаҳкамлашга ва жаҳон рейтинггидаги очколари сонини оширишга олиб келди.

Таъкидлаш лозим, 5 март куни ушбу мусобақанинг 7-тур баҳсларида Абдусатторов Винсент Кеймерга қарши дона суриб, ғалабага эришганди. 8-турда турнирдаги асосий таъқибчиси эронлик Парҳам Магсудлуни мағлуб этди ва муддатидан олдин чемпионликка эришди.

“Prague International Chess Festival-2024" халқаро турниридаги ғалабасидан сўнг Нодирбек Абдусатторов онлайн рейтингда амалдаги жаҳон чемпиони хитойлик Дин Лиженни ортда қолдириб, дунёнинг тўртинчи рақамли шахматчисига айланди.  

Мазкур мусобақада ғолибликни тантана қилган Нодирбек Абдусатторов Прага шаҳридаги “Туркистон” ватандошлар жамиятида ушбу мамлакатда меҳнат қилаётган, таҳсил олаётган ёшлар билан суҳбат ўтказди. Улар билан ўз фаолияти, ўтказилажак ўйинлари хусусида фикрлашди. Учрашув давомида чемпионимиз ҳамюртларимизга маҳорат дарси ўташ билан бирга, ушбу даражага эришиш учун йўриқномалар кўрсатди. Ташкилотнинг фаол аъзолари сўзга чиқиб, Президентимиз Шавкат Мирзиёев раҳбарлигида Янги Ўзбекистоннинг янгича қиёфаси бунёд этилаётгани, бу, барча жабҳаларда, айниқса, ёшлар ҳаётида ўз ифодасини топаётганини таъкидлади.

Бевосита Прага мусобақаларининг сўнгги 9-тур ўйинларининг қолган жуфтликлардаги баҳсларга тўхталадиган бўлсак, Праггнанандҳаа – Давид Наварра-0,5:0,5, Винсент Кеймер – Матеуш Бартел – 0,5:0,5,, Парҳам Магсудлу – Доммаражу Гукеш – 0,5:0,5, Таи Даи Ван Нгуен – Видит Сантош Гуджрати – 0,5:0,5 натижалари қайд этилди.

Бу, ўз навбатида Абдусатторовдан кейинги ўринлар 5 очколи чехиялик Таи Даи Ван Нгуен, эронлик Парҳам Магсудлу ва ҳиндистонлик Рамешбабу Праггнанандҳаага тегишли бўлишини таъминлади.

Т. Рўзиев, ЎзА