Guliston davlat pedagogika institutining texnologiya yo‘nalishi 2-bosqich talabasi Nodira Orifjon qizi Iskandarova Rossiya davlatining Nijniy Novgorod shahrida o‘tgan Xalqaro va Butunrossiya festivalining “Talantы Rossii” masofaviy ochiq tanlovida ishtirok etib, 1-darajali diplom bilan taqdirlandi.

Ushbu tanlov 2014 yildan buyon Rossiya davlatining Madaniyat, Maorif va fan vazirliklari tomonidan o‘tkazilib kelinadi. Tanlovning asosiy maqsadi talantli yoshlarni aniqlash va qo‘llab-quvvatlash, oliy o‘quv yurtlarida tahsil olayotgan yoshlarning intellektual va ijodiy qobiliyatlarini rivojlantirish, ilmiy bilimlar, ijodiy va sportdagi yutuqlarini targ‘ibot-tashviqot qilishdan iboratdir. 

Festivalning “Talantы Rossii” tanlovi internet tarmog‘i orqali o‘tkaziladi va chegara bilmaydi. Nodira Iskandarova Xalqaro tanlovda “Dekorativno-prikladnoye tovorchestvo” (“Amaliy-dekorativ ijod”) yo‘nalishida qo‘lda to‘qigan “Opa-singillar” (“Syostrы”) qo‘g‘irchoqlari bilan ishtirok etdi. Hakamlar hay’ati bir ovozdan tanlovga taqdim etilgan ijodiy ishning barcha qirralarini yuqori baholadi. Bular – ijodiy ishning tugallanganligi, tanlov talablariga to‘liq javob berishi, yosh toifasiga to‘g‘ri kelishi, hech qanday kamchiligi yo‘qligi baholashda professional hakamlar hay’atining yakdil qarorga kelishiga sabab bo‘ldi. Nodira Iskandarovaning “Opa-singillar” ijodiy ishini nufuzli hakamlar hay’ati 9,4 ball bilan baholadi. 

– Mening bu yutug‘im 2024 yilni muhtaram Prezidentimiz “Yoshlar va biznesni qo‘llab-quvvatlash yili” deb e’lon qilgan yilga to‘g‘ri keldi, – deydi Nodira. – O‘zbekistonlik yoshlar orasida iqtidorlilar juda ko‘p. Mening nazarimda endi tengdoshlarim o‘zlarini ko‘rsatadigan payt keldi. 

Sh.Suyarov, O‘zA.