Эронлик инсон ҳуқуқлари ҳимоячиси, Нобель тинчлик мукофоти совриндори Наргис Муҳаммадийга нисбатан яна янги ҳукм чиқарилди. Аёллар ҳуқуқлари учун қарийб 30 йилдан бери курашиб келаётган 53 ёшли фаолга 7,5 йил қамоқ жазоси тайинлангани маълум қилинди. Бу ҳақда “TheGuardian” нашри ёзиб чиқди.

Наргиснинг адвокати Мустафо Нилининг айтишича, суд уни “ахборот тўплаш ва давлатга қарши фитна уюштириш” айби билан 6 йилга, шунингдек, “тарғибот фаолияти” учун қўшимча 1,5 йилга озодликдан маҳрум этган. Бундан ташқари, унга икки йил ички сургун, икки йил чет элга чиқиш тақиқи ҳам белгиланган.

Фаол ҳуқуқшунос Хусрав Аликордининг шубҳали ўлимини қоралаб чиқиш ортидан ҳибсга олинган эди. Шундан сўнг у узоқ вақт тўлиқ изоляцияда, ташқи алоқаларсиз сақланган.

Муҳаммадий 2023 йилда қамоқда ўтирган пайтида Эронда аёллар ҳуқуқлари ва ўлим жазосини бекор қилиш йўлидаги фаолияти учун Нобель тинчлик мукофотига сазовор бўлган эди. Унга чиқарилган янги ҳукм мамлакатда норозиликлар кучайиб, ҳукумат мухолифатга босимни ошираётган бир пайтга тўғри келди ва халқаро ҳамжамиятда яна жиддий саволларни кун тартибига чиқармоқда.

Ф.Яхшибоева, ЎзА